यथार्थ

आज श्रावण ६ गते , विपि कोइरालाको स्मृति दिवस, साँझको समयमा परमधामको कुनै स्थानमा एक्लै बसेर नेपाली राजनितिका महानायक एवं नेपाली कांग्रेसका संस्थापक , जननेता विपी कोइराला आफ्नो एण्ड्रोइड मोवाइलको चौडा स्क्रिनमा लामा लामा औंलाले स्क्रोल गर्दै आफ्नो फेसबुक हेर्दै थिए । काठमाण्डौ लगायत धेरै जिल्लाहरूमा बिभिन्न विचार गोष्ठीहरू सम्पन्न भएछन् । त्यसैगरि कहीं वृक्षारोपण त कहीं बृद्ध , असहाय , अशक्त र बिरामीहरूलाई फलफुल वितरण गरेका रहेछन् । 
यिनै सन्दर्भहरूमा स्थानिय नेता कार्यकर्ताहरूले अपलोडेका बर्गेल्ती फोटाहरू माथि उनी एकछिन टक्क अडिदै अगाडी स्क्रोल गर्दै जाँदैछन । कुनै कुनै पुरानो महत्वको स्थानमा केही गरेनछन् , उनलाई पूर्ण रूपमा बिर्सेछन् । यो थाहा पाउँदा उनलाई कार्यक्रम गर्नेले पनि केवल झारो टार्न केही गरेको जस्तो लागेको छ भनेर उनको स्निग्ध मुहारले देखाइरहेको थियो । 
सबैले आ-आफ्नो पोष्टमा उनले धेरै बर्ष पहिले बोलेको "सुकिलो मुकिलो " वाला भनाईलाई महत्वका साथ पोस्ट्याएको देखेर उनले मनमनै सोचे : " मैले अधुरो बोलेको कुरालाई सबैले समय सापेक्ष भनेर प्रचार गरेका रहेछन् तर यो अब अपूर्ण राख्न हुदैन , मैले त्यसलाई पुरा गर्नु आवश्यक भइसकेको रहेछ त्यसैले म पनि अब एउटा स्टाट्याटस पोष्ट्याइदिनुपर्यो । "
यस पछी उनले एउटा फेसबुक स्ट्याटस लेखे जुन यस्तो थियो - " मुलुकमा गणतन्त्र आएपछी ठूलाठूला भिडको नेतृत्व गर्ने , त्यस्तै महलहरूमा बस्ने , महंगा एवं चिल्ला गाड़ी चढ्ने , पहुँच , पैसा र पाखुरा भएकाहरू पार्टीमा हावी हुनेछन र त्यस्तो बिरुद्ध एकपल्ट फेरी नेपाली कांग्रेसको लागी रगत र पसिना बगाउने निष्ठावान कार्यकर्ताहरूले ठूलो संघर्ष गर्नु पर्ने छ । अब त्यो बेला आइसक्यो । "