“ घाम र हामी “

आज बिहान पनि घाम 
पूर्वी कुईनेटोबाट हाँस्दै चिहायो ।
झुक्किएका नागरिक हामी
हाम्रो निरिहतामा घाम 
यसरी नै हाँस्दै आउँछ
दिन भरिको प्रितीले
सन्ध्या संगै
निराश निराश भएर
विदा लिन्छ ।
हामीले भोगेको नियति
हाम्रो माटोको गन्ध
पहिलो पटकको वर्षा संगै
नाकबाट प्रवेश गर्दा
उर्लिने राष्ट्रप्रेम संगै
पासपोर्ट बोकेर
पर परका मुलुकमा
पसिना बगाउनु हो
आफ्नो मायाले बनाएको
गुँड छोडेर एक्लै
परदेशिनुको भोगाई
हाम्रै नाममा जन्मभुमी माथि
बलात्कार गर्नेहरुलाई के थाह
थाह पाएर पनि मौन भईदिने
हाम्रो यो कायर स्वभाव
अनि दासत्व स्वीकार गर्ने
प्रवृति देखेर
घाम सधैं हाँस्दै उदाउँछ
अट्टहास गर्दै ! !